Zyra Rregullatore për Ujë dhe Mbeturina (ZRRUM) është rregullator i pavarur ekonomik për shërbimet e ujësjellësit dhe mbeturinave në Kosovë.

Roli i ZRRUM është që të sigurojë ofrimin e shërbimeve cilësore, efiçente, dhe të sigurta në baza jo-diskriminuese për tërë konsumatorët në Kosovë, duke pasur parasysh mbrojtjen e mjedisit dhe të shëndetit publik.

Autorizimet dhe përgjegjësitë e ZRRUM përfshijnë:

• Licencimi i ndërmarrjeve publike që ofrojnë shërbimet e: (i) ujësjellësit dhe kanalizimit, të ujrave të zeza (ii) furnizimin e ujit me shumicë për ndërmarrjet e ujësjellësit, (iii) grumbullimit dhe transportimit të mbeturinave, dhe (iv) deponimit të mbeturinave (të gjithë bashkë “Ofruesit e Shërbimeve”);
• Përcaktimi i tarifave të shërbimit për ofruesit e shërbimeve të licencuar nga ZRRUM, duke u përkujdesur që tarifat të jenë të drejta dhe të arësyeshme dhe të mundësojnë qëndrueshmërinë financiare të Ofruesve të Shërbimeve;
• Mbikqyrja e zbatimit të standardeve të shërbimit që ofrojnë Ofruesit e licencuar të Shërbimeve;
• Aprovimi dhe mbikqyrja e zbatimit të Kartës së Konsumatorëve që rregullon të drejtat dhe obligimet e ndërsjella ndërmjet konsumatorëve dhe Ofruesve të Shërbimeve të licencuar nga ZRRUM;
• Mbikqyrja e zbatimit të shkyçjeve të konsumatorëve dhe rregullimit të kyçjeve ilegale në sistemin e ujësjellësit dhe kanalizimit;
• Themelimi dhe mbështetja e Komisioneve Këshilluese të Konsumatorëve në shtatë regjionet e Kosovës.

Llogaridhënia e ZRRUM

Në pajtim me Ligjin Nr. 03/L-086, për punën e vet, ZRRUM i përgjigjet Kuvendit të Kosovës i cili e emëron Drejtorin dhe Zëvendësdrejtorin e ZRRUM në bazë të rekomandimeve të Qeverisë së Kosovës.

Financimi i ZRRUM

Financimi i ZRRUM bëhet nga taksat e licencimit që paguajnë Ofruesit e  Shërbimeve të licencuar nga ZRRUM.